የአፍጋኒስታን ልዑክ የመንግሥታቱን ድርጅት ጠቅላላ ጉባኤ መድረክ ጥሎ መውጣቱ ተሰማ

አምባ ዲጂታል፣ ሰኞ መስከረም 17፣ 2014 ― ከመላው ዓለም የተውጣጡ መሪዎች በተገኙበት 76ኛው የመንግሥታቱ ድርጅት ጠቅላላ ጉባኤ ላይ ሲሳተፍ የነበረው የአፍጋኒስታን ልዑክ ውይይቱን ጥሎ መውጣቱን አዣንስ ፍራንስ ፕረስ ዘግቧል።

በዚህ ጉባኤ ላይ አፍጋኒስታንን ማስተዳደር ከጀመረ ሳምንታትን ያስቆጠረው ታሊባን ንግግር ለማድረግ ጥያቄውን ማቅረቡ መነገሩ አይዘነጋም።

ይህንኑ የታሊባን የውጪ ጉዳይ ሚኒስትር አሚር ካህን ሙታቂ የዛሬ ሳምንት ሰኞ በላኩት ደብዳቤ ነበር ጥያቄውን ያቀረቡት።

ሆኖም ከዛሬ ሰኞ በፊት ጉባኤው በጉዳዩ ላይ እንደማይሰበሰብና እስከዚያ ድረስ የቀድሞው የአፍጋኒስታን አምባሳደር መቀመጫቸውን ይዘው እንደሚቀጥሉ ተነግሮ ነበር።

በዛሬው እለቱ የጉባኤውን መድረክ ጥሎ ወጥቷል የተባለው የአፍጋኒስታንን ልዑክ ለምን ጥሎ እንደወጣ በዝርዝር የተነገረ ነገር የለም።