አምባ ዲጂታል፣ ሐሙስ ኅዳር 2፣ 2014 ― የአሜሪካ የውጭ ጉዳይ ሚኒስትር አንቶንዮ ብሊንክን ከአፍሪካ ኅብረት የአፍሪካ ቀንድ ልዩ መልእክተኛ ኦሊሴጉን ኦባሳንጆ ጋር በኢትዮጵያ ጉዳይ መነጋገራቸውን የአሜሪካ ውጭ ጉዳይ መስሪያ ቤት አስታውቋል፡፡

ብሊንክን እና ኦባሳንጆ ባደረጉት የስልክ ቆይታ፣ ብሊንክን ኦባሳንጆ በኢትዮጵያ ጦርነት ተፋላሚ አካላትን ለማሸማገል ለሚያደርጉት ጥረት አገራቸው ያላትን ድጋፍ ገልጸዋል ነው የተባለው፡፡

ሁለቱ ባለስልጣናት ተፋላሚ አካላት በአስቸኳይ ወታደራዊ እንቅስቃሴዎችን አቁመው ወደ ተኩስ አቁም የሚደረስበትን እንዲሁም የሰብአዊ አቅርቦትን አስፈላጊነት በተመለከተ በቆይታቸው አንስተዋል፡፡

በዚሁ ቆይታ ወቅት ብሊንክን ከሁሉም አካላት የሚሰነዘሩ አደገኛ ትርክቶች ኢትዮጵያ ውስጥ ለእርስ በርስ ግጭት መነሻ እንዳይሆኑ ስጋታቸውን መግለጻቸውን መስሪያ ቤታቸው ያወጣው መግለጫ ያመለክታል፡፡

ከአሜሪካ የውጭ ጉዳይ ሚኒስትር ጋር በኢትዮጵያ ጉዳይ የመከሩት የአፍሪካ ቀንድ ልኡኩ ኦሊሴጉን ኦባሳንጆ፣ ከባለፈው ሳምንት መገባደጃ ቀናት አንስቶ በኢትዮጵያ ቆይታ አድርገዋል፡፡ በዚሁ ቆይታቸው ጠቅላይ ሚኒስትር ዐቢይ አሕመድን ጨምሮ፣ ወደ መቐለ በመጓዝ የሕወሓት ሊቀመንበሩ ዶክተር ደብረጽዮን ገብረሚካኤልን ማግኘታቸው ተነግሯል፡፡ ከዚህ በተጨማሪ የኦሮሚያ ክልል ርእሰ መስተዳደር አቶ ሺመልስ ዐብዲሳን ያነጋገሩ ሲሆን፣ ከሁለት ቀናት በፊት ማክሰኞ ጥቅምት 30፣ 2014 ደግሞ ባሕር ዳር እና ሰመራ አቅንተው ነበር፡፡

ከዚህ በተጨማሪም ኦባሳንጆ በኢትዮጵያ ቆይታቸው ከአሜሪካው የአፍሪካ ቀንድ ልኡክ ጄፍሪ ፌልትማን ጋር መነጋገራቸው ተገልጧል፡፡

አንድ ዓመት የተሻገረውን የሰሜን ኢትዮጵያ ጦርነት ለማሸማገል እየተንቀሳቀሱ የሚገኙት ኦባሳንጆ፣ ከሁለቱም ወገን አሉታዊ ምላሽ እንዳልገጠማቸው ለመገናኛ ብዙኃን ተናግረዋል፡፡