የጤና ሚኒስቴር ለኮቪድ 19 የሚደረገው ጥንቃቄ መዘናጋት አሳስቦኛል አለ

አምባ ዲጂታል፣ ረቡዕ ነሐሴ 5፣ 2013 ― በአገሪቱ ለኮቪድ 19 የሚደረገው ጥንቃቄ መዘናጋት እንዳሳሰበው የጤና ሚኒስቴር አስታውቋል፡፡

የጤና ሚኒስቴር ሚኒስትር ዴኤታ ዶክተር ደረጀ ድጉማ እንደገለጹት የህብረተሰቡ መዘናጋትና ቸልተኝነት የሚያሳስብ ሆኗል፡፡

ዶክተር ደረጄ መንግስት ዜጎች እንዲጠነቀቁ ለማድረግ የተለያዩ ንቅናቄዎችን እያደረገ ቢሆንም ማህበረተሰቡ ተዘናግቷል ብለዋል።

በኢትዮጵያ የቫይረሱ ስርጭት ከዚህ በፊት ከነበረው አሁን ቁጥር ጨምሯል ያሉት ሚኒስትር ዴኤታው፣ የጽኑ ህሙማን ክፍሎችም እየተጨናነቁ ናቸው ብለዋል፡፡

የኮቪድ 19 ምርምራ አሁን ላይ በርካታ ሰዎች በሚገኙበት ቦታ እና በኬላዎች አካባቢ ላይ ተጠናከሮ መቀጠሉንም የተነገሩት ሚኒስትር ዲኤታው፣ በቀጣይ ሁሉም የጤና ባለሙያዎች ትኩረት እንዲያደረጉ የተለየ ዝግጅት ላይ እንደሚገኙም ነው የገለጹት፡፡

አያይዘውም የመተንፈሸ መሳሪያዎች እጥረት እና ህክምና መስጫ ተቋማት እየሞሉ በመሆኑ ህብረተሰቡ ከፍተኛ ጥንቃቄ እንዲያደርግም ጥሪ አቅርበዋል መባሉን የዘገበው ፋና ነው፡፡