በአማራ ክልል በጦርነት የወደሙ ትምህርት ቤቶችን መልሶ ሥራ ለማስጀመር ከ11 ቢሊዮን ብር በላይ ያስፈልጋል ተባለ

በአማራ ክልል የሕወሓት ኃይሎች አውድመዋቸዋል የተባሉ ከ4 ሺሕ የሚበልጡ የትምህርት ተቋማትን መልሶ ሥራ ለማስጀመር ከ11 ቢሊዮን ብር በላይ እንደሚያስፈልግ የተገለጸው በባህር ዳር ከተማ እየተካሄደ ባለ ውይይት ላይ ነው፡፡

በዚህ ውይይት ላይ የተገኙት የትምህርት ሚኒስትሩ ፕሮፌሰር ብርሀኑ ነጋ ህወሓት የትምህርት ተቋማት ላይ ከፍተኛ ውድመት ማድረሱን መግለጻቸውን ፋና ዘግቧል፡፡

አያይዘውም እነዚህ ትምህርት ቤቶች ባለድርሻ አካላትን በማስተባበር በመገንባትና በመጠገን ሥራ እንዲጀምሩ ለማድረግ መንግስት በቁርጠኝነት እንደሚሠራ ተናግረዋል ነው የተባለው፡፡

የትምህርት ተቋማትን መልሶ ሥራ ለማስጀመር በሚደረገው ርብርብ የሁሉም ባለድርሻ አካላት ተሳትፎ ወሳኝ መሆኑንም ነው ሚኒስትሩ አመልክተዋል፡፡

የአማራ ክልል ትምህርት ቢሮ ሃላፊ ዶክተር ማተቤ ታፈረ በበኩላቸው፣ የህወሓት ቡድን በወረራ ይዟቸው በቆዩ የክልሉ አካባቢዎች ከ4ሺህ የሚበልጡ የትምህርት ተቋማት በመውደማቸው በመውደማቸው ከ1 ነጥብ 8 ሚሊየን በላይ ተማሪዎች ከትምህርት ገበታ እንዲሁም 116 ሺህ መምህራን ከሥራ ውጭ ሆነዋል።