አቶ ሰማ ጥሩነህ የአማራ ክልል ሰላም እና ደኅንነት ቢሮ ኃላፊ ተደርገው መሾማቸው ተነገረ

አምባ ዲጂታል፣ ሐሙስ ሚያዝያ 21፣ 2013 ― የአማራ ክልላዊ መንግሥት አቶ ሰማ ጥሩነህን በምክትል ርዕሰ መስተዳድር ማእረግ የክልሉ ሰላም እና ደኅንነት ቢሮ ኃላፊ አድርጎ መሾሙ ተነግሯል፡፡

አዲሱ የሰላም እና ደኅንነት ቢሮ ኃላፊ አቶ ሰማ፣ ከዚህ ቀደም በተለያዩ የፌዴራል እና የክልል ኃላፊነቶች ያገለገሉ መሆናቸው ተነግሮላቸዋል፡፡

ከነዚህ መካከል በአዊ ብሔረሰብ ዞን አስተዳደር የአንክሻ ጓግሳ ወረዳ የብልጽግና ፓርቲ የክልል ምክር ቤት ተወካይ፣ በኢፌዴሪ የፌደራል ጉዳዮች ሚኒስትር የሶማሊ ብሔራዊ ክልላዊ መንግሥት አማካሪ፣ የአማራ ብሔራዊ ክልላዊ መንግስት የመንግሥት ኮሙዩኒኬሽን ጉዳዩች ቢሮ ምክትል ቢሮ ኃላፊ እንዲሁም የአማራ ብሔራዊ ክልላዊ መንግሥት ርዕስ መስተዳድር ልዩ አማካሪ እና በተለያዩ ልዩ ልዩ ኃላፊነቶች ቆይተዋል፡፡

አቶ ሰማ ጥሩነህ በመጪው ሰኔ ወር እንግሊዝ አገር ከሚገኝ ዩንቨርሲቲ በኢንተርናሽናል ቢዝነስ ትምህርት ዘርፍ የዶክትሬት ዲግሪያቸውን ያጠናቅቃሉ ተብሏል።

ባለፉት ቀናት በሰሜን ሸዋ አካባቢ የተፈጠረውን የጸጥታ ችግር ተከትሎ እርምጃዎችን እንደሚወስድ ሲያስጠነቅቅ የነበረው የአማራ ክልል በትላንትናው እለት በተመሳሳይ የፖሊስ ኮሚሽሩን በአዲስ መተካቱ መነገሩ ይታወሳል፡፡