የገና እና ፋሲካ ባዛር ለማዘጋጀት በ110 ሚሊዮን ብር ያሸነፈው ድርጅት ኮንትራት ተሰረዘ

አምባ ዲጂታል፣ ቅዳሜ ታኅሣሥ 2፣ 2014 ― መጪውን የገና እና ቀጣዩን ፋሲካ በዓላት ለማዘጋጀት ከኤግዚቢሽን ማዕከል በ110 ሚሊዮን ጨረታ ያሸነፈው ቤታሆን ኤቨንትስ ኮንትራቱ የተሰረዘው ቅድመ ክፍያ ባለማስገባቱ ነው።

ቤታሆን ኤቨንስትስ ለሁለቱ መጪ በዓላት ያስገባው 110 ሚሊዮን ብር ቀድሞ ከነበረው 65 በመቶ ጭማሪ ያሳየ በታሪክ ከፍተኛ የተባለ የጨረታ ገንዘብ እንደነበር ሪፖርተር ጋዜጣ ዘግቧል።

አሁን ኮንትራቱ የተሰረዘበት ቤታሆን፣ ዓምና በሚያዝያ ወር ሊያዘጋጅ የነበረው የኢትዮጵያ ባንኮች እና ኢንሹራንስ ኤክስፖን ሊያዘጋጅ አቅዶ በኮሮና ምክንያት ሳይሳካለት ቀርቷል።

የኤግዚቢሽን ማዕከል ዋና ሥራ አስኪያጅ አቶ ጥላሁን ታደሰ እንዳሉት ከሆነ ድርጅቱ ከሁለት ሳምንት በኋላ ለሚከፈተው የገና ባዛር ከገንዘቡ 60 በመቶውን እንዲያስገባ የተለያዩ ሁኔታዎችን ከግንዛቤ በማስገባት ቢጠበቅም ሊያስገባ አልቻለም።

የኤግዚቢሽን ማዕከል ለቤታሆን ኤቨንትስ ገንዘቡን እንዲያስገባ ያስቀመጠው ቀነ ገደብ የተጠናቀቀው ትላንት እኩለ ቀን መሆኑን ገልጸዋል።

ጉዳዩን የሚታዘቡ ሰዎች ኤቨንት አዘጋጁ ቀድሞም ቢሆን የተጋነነ እንደነበር መናገራቸው በዘገባው ተጠቅሷል።

የቤታሆን ኤቨንትስን ኮንትራት የሰረዘው ኤግዚብሽን ማዕከል፣ ባዛሩን በራሱ ለማዘጋጀት እቅድ እንዳለው ተገልጿል።