የአገር መከላከያ ሠራዊት የአማራ ክልል አካባቢዎችን በሚቆጣጠሩ የሕወሃት ኃይሎች ላይ የአውሮፕላን ድብደባ እያካሄደ እንደሚገኝ ተዘገበ

የአገር መከላከያ ሠራዊት የአማራ ክልል አካባቢዎችን በሚቆጣጠሩ የሕወሃት ኃይሎች እና እና ይዞታዎቻቸው ላይ የአውሮፕላን ድብደባ እያካሄደ እንደሚገኝ ከሕወሃት ቃሎ አቀባይ ጌታቸው ረዳ መስሚቱን ሬውተርስ የዜና ወኪል ዘግቧል።

የአየር ድብደባው ዓላማ መጠነ ሰፊ የምድር ላይ ጥቃት ለመጀመር ነው ብለው እንደሚያምኑ ጌታቸው ረዳ መግለጻቸው በዘገባው ተመላክቷል።

አቶ ጌታቸው አክለውም መከላከያ ሠራዊት በሁሉም ግንባሮች በመድፍ እና ሰው አልባ አውሮፕላኖች (ድሮን) በመታገዝ የማጥቃት ዝግጅት እያደረገ መሆኑን ጠቅሰዋል።

ከትላንት ሐሙስ መስከረም 27 ጀምሮ እየተካሄደ ነው የተባለው የአየር ድብደባ፣ አፋር እና አማራ ክልሎችን በሚያገናኘው መንገድ በወገልጤና እና ውርጌሳ ከተሞች አካባቢ እንደሆነ ዘገባው አመልክቷል።

የዜና ወኪሉ በውርጌሳ አካባቢ የአውሮፕላን ድብደባ እንደነበር የዲፕሎቲክ ምንጮችም እንዳረጋገጡለት ነው የዘገበው።

በጉዳዩ ላይ የአገር መከላከያ ሠራዊት፣ የአማራ ክልልም ሆነ የጠቅላይ ሚኒስትር ጽሕፈት ቤት ቃል አቀባዮች ያሉት ነገር የለም።

በሰሜን ዕዝ የደረሰውን ጥቃት ተከትሎ የተጀመረው የሕወሃት ኃይሎች እና የፌዴራል መንግስቱ ጦርነት በቀጣዩ ጥቅምት ወር መጨረሻ አንድ ዓመት ይደፍናል።