ለሕወሓት ሲሰሩ ነበሩ የተባሉ 16 የሠራዊት አባላት ላይ እስከ 18 ዓመት የሚደርስ ፅኑ እስራት ውሳኔ ተላለፈ

አምባ ዲጂታል፣ ቅዳሜ ነሐሴ 29፣ 2013 ― የደቡብ ዕዝ ቀዳማዊ ወታደራዊ ፍርድ ቤት የዕዙ የሠራዊት አባላት ሆነው በአሸባሪነት ለተፈረጀው የህወሓት ቡድን ሲሰሩ ነበሩ ባለቸው 16 የሠራዊት አባላት ላይ የፍርድ ውሳኔ አሳልፏል፡፡

ተከሳሽ የሠራዊት አባላቱ ከቀረቡባቸው ክሶች አንዳንዶቹን አስተባብለው የተከራከሩ ሲሆን፣ አንዳንዶቹን አምነዋል ነው የተባለው፡፡

አቃቤ ሕግም የሰነድና የሰው ማስረጃዎችን አቅርቦ የተከራከረ ሲሆን፣ የተከሳሽ ጠበቆች በበኩላቸው ተከሳሽ የሠራዊት አባላቱ ከዚህ ቀደም በርካታ አዎንታዊ ተግባራትን ያከናወኑ እና የቤተሰብ አስተዳዳሪ መሆናቸውን ከግምት ውስጥ በማስገባት ፍርድ ቤቱ የቅጣት ማቅለያ እንዲያደርግላቸው ጠይቋል።

ወታደራዊ ፍርድ ቤቱ ትላንት ጠዋት ባስቻለው ችሎት በ16 የሠራዊት አባላት ላይ የጥፋተኝነት ብይን ሰጥቷል።

በዚሁ መሠረት ተከሳሾቹ ላይ ዝቅተኛው 2 ዓመት ከ9 ወር ሲወሰን፣ ከፍተኛ የእስር ቅጣት ደግሞ 18 ዓመት ከ8 ወር ተጥሎባቸዋል መባሉን ብሔራዊ ቴሌቪዥን ዘግቧል፡፡
ወታደራዊ ፍርድ ቤቱ ፍርደኞቹ የእስር ቅጣቱ በወንጀል ድርጊት ተጠርጥረው እጃቸው ከተያዘበት ቀን ጀምሮ በሚታሰብ ፅኑ እስራት እንዲቀጡ ነው ብይን የሰጠው፡፡