የኢትዮጵያ የሃይማኖት ተቋማት ጉባኤ ልዩ ሀገር አቀፍ የጸሎት እና ምህላ ጊዜ አወጀ

አምባ ዲጂታል፣ ሐሙስ ነሐሴ 27፣ 2013 ― የኢትዮጵያ የሀይማኖት ተቋማት ጉባኤ በወቅታዊ የሀገሪቱ ሁኔታ እና መጪውን የ2014 ዓመት በማስመልከት የሠላም ጥሪና የመልካም ምኞት መግለጫ አስተላልፏል።

በመግለጫው ለወጣቶች እና ወላጆች ለሁሉም የክልልና የፌደራል መንግስት ባለስልጣናት፣ ለመገናኛ ብዙሃን እንዲሁም ለመላው ኢትዮጵያውያን ሠላማዊ እና የሰከነ አካሄድ እንዲከተሉ ጥሪ አቅርቧል።

የጉባኤውን መግለጫ ያቀረቡት ሊቀ ትጉሃን ቀሲስ ታጋይ ታደለ፣ በሰሜኑ ክፍል ያለው ጦርነት ከመጀመሩ በፊትም ሆነ ከዛ በኋላ እንደ ሃይማኖት አባቶች ታሪክ የማይረሳው ጥረት ቢደረግም ሊሳካ አለመቻሉን ገልጸዋል፡፡

ይሁን እንጂ ጦርነት አውዳሚ በመሆኑ የሀይማኖት አባቶች የሰላም ጥሪ ለሁሉም ይድረስ ብለዋል።

በኢትዮጵያ የሀይማኖት ተቋማት ጉባኤ በታወጀዉ ሀገር አቀፍ የፀሎትና ምህላ ጊዜ ላይ ሁሉም ኢትዮጵያዊያን ሀገራቸውን በፀሎት እንዲያስቡም አሳስበዋል።