ደቡብ ኮሪያ ዜጎቿ ወደ አማራ ክልል ሁለት አካባቢዎች የሚያደርጓቸውን ጉዞዎች እንዲሠርዙ አሳሰበች

አምባ ዲጂታል፣ ዐርብ ነሐሴ 7፣ 2013 ― ደቡብ ኮሪያ ወደ አማራ ክልል ጉዞ ለማድረግ እቅድ ያላቸው ዜጎቿ ጉዟቸውን እንዲሰርዙት አልያም እንዲያዘገዩት አሳስባለች፡፡

የደቡብ ኮሪያ የውጭ ጉዳይ ሚኒስቴር የአገሪቱን ዜጎች ያሳሰበው በአማራ ክልል ሰሜን ወሎ እና ምሥራቅ ጎጃም ለሚያደርጓቸው ጉዞዎች ነው፡፡

አገሪቱ ዜጎችዋ ወደ ተጠቀሱት አካባቢዎች ተጉዘው ከሆነም ደኅንነታቸው የተጠበቁ ቦታዎች ላይ እንዲቆዩ ነው ያሳሰበችው፡፡

የኢትዮጵያን ወቅታዊ ሁኔታ በንቃት እየተከታተለ እንደሚገኝ የገለጸው የደቡብ ኮሪያ የውጭ ጉዳይ ሚኒስቴር፣ እንደ ሁኔታው ማስተካከያችን እንደሚያወጣም ጠቁሟል፡፡

የደቡብ ኮሪያ የውጭ ጉዳይ ሚኒስቴር በጠቀሰው በተለይ በሰሜን ወሎ አካባቢ ጦርነት መኖሩን የሚያመለክቱ መረጃዎች በተደጋጋሚ ሲወጡ መሰንበታቸው ይታወቃል፡፡