ባልደራስ የአቶ እስክንድር ነጋ ደኅንነት ስጋት ውስጥ ጥሎኛል አለ

አምባ ዲጂታል፣ ረቡዕ ሰኔ 2፣ 2013 ― ሊቀመንበሩ አቶ እስክንድር ነጋ በእስር ቤት የሚገኙበት የባልደራስ ለእውነተኛ ዲሞክራሲ (ባልደራስ) የእስር ሁኔታቸው ከፍተኛ ስጋት ፈጥሮብኛል ብሏል፡፡

ፓርቲው በተለይ ከግንቦት 27፣ 2013 ጀምሮ አቶ እስክንድር ቀድሞ ታስረውበት ከነበረው ‹‹ዋይታ›› ተብሎ ከሚጠራው ዞን ደርሶባቸዋል ባለው የሰብዓዊ በደል ምክንያት 8ኛ ዞን ተብሎ ወደሚጠራው ቦታ እንዲዛወሩ መደረጋቸውን አስታውሷል፡፡

ሆኖም አሁን ታስረው ባሉበት ቦታ በእስረኞች የደህንነታቸው ሁኔታ አደጋ ላይ እንደወደቀ የፓርቲው ከፍተኛ አመራሮች ማረሚያ ቤቱ ድረስ በመሄድ ለማረጋገጥ ችለዋል ነው ያለው፡፡

ፓርቲው አቶ እስክንድር ነጋ እየገጠማቸው ያለውን ‹‹የደህንነት አደጋ፣ ማረሚያ ቤቱም ሆነ ጠቅላይ ዓቃቤ ሕጉ እያወቁ መፍትሄ ለመስጠት ባለመፈለጋቸው አዝኗል›› ያለ ሲሆን፣ ‹‹ችግሩ ከኦህዴድ/ብልጽግና የበላይ አካላት የተሰጠበት ፖለቲካዊ አቅጣጫ እንደሆነ የሚያሳይ ሆኖ አግኝተነዋል›› ሲል አስታውቋል፡፡

አክሎም ‹‹የቃሊቲ ማረሚያ ቤትም ሆነ በሕግ የእስረኞችን ደህንነት የማስጠበቅ ኃላፊነት የተጣለበት ጠቅላይ ዓቃቤ ሕግ፣ የአቶ እስክንድር ደህንነት አደጋ ላይ በመውደቁ ምክንያት ሊፈጠር ለሚችል ማናቸውም ነገር ሙሉ ለሙሉ ኃላፊነቱን እንደሚወስዱ ማስገንዘብ እንወዳለን›› ብሏል፡፡

ከዚህ በተጨማሪም ‹‹የእስክንድር ነጋ ደህንነት ኦህዴድ/ብልጽግና በፍትህ አደባባይ ለደረሰበት ውርደት መበቀያ ሳይሆን የመላ ሀገሪቱን ደህንነት አደጋ ላይ የሚጥል ቀይ መስመር መሆኑን ተረድቶ፣ ለተፈጠሩ ችግሮች በአስቸኳይ መፍትሄ እንዲሰጥ›› በማለትም አሳስቧል፡፡