የኢትዮጵያ አየር መንገድ ዓለም አቀፉን የኮቪድ 19 የይለፍ መተግበሪያን በመጠቀም ከአፍሪካ ቀዳሚ ሆነ

አምባ ዲጂታል፣ ረቡዕ ሚያዝያ 20፣ 2013 ― የኢትዮጵያ አየር መንገድ ዓለም አቀፉን የኮሮና ቫይረስ የይለፍ መተግበሪያ በመጠቀም ከአፍሪካ የመጀመርያው መሆኑን አስታውቋል፡፡

አየር መንገዱ በድረ ገጹ ላይ እንዳስታወቀው በዓለም አቀፉ የአየር ትራንስፖርት ማኅበር (አያታ) የተዘጋጀውን የዲጂታል የይለፍ መተግበሪያን በመቀበል በአፍሪካ ካሉ አየር መንገዶች የመጀመርያው ሆኗል።

የኮሮና ቫይረስ ውጤትን ብሎም የክትባት ሁኔታን ለመለየት እንደሚያግዝ የተነገረለት ይህ መተግበሪያ፣ ተጓዦችን፣ አየር መንገዱን፣ ላቦራቶሪዎችን እንዲሁም መንግሥትን በማቆራኘት ትክክለኛ የኮሮና ቫይረስ የምርመራ ውጤት በጉዞ ወቅት መቅረቡን የሚያረጋግጥ ነው።

ይህም ተጓዦች የኮሮና ቫይረስ ውጤታቸውን እና የክትባት ማረጋገጫቸውን ቀድመው የሚያይዙበት ነው።

የኢትዮጵያ አየር መንገድ ይህንን የዲጂታል የይለፍ ሥርዓት በአራት የተለያዩ ዓለም አቀፍ በረራዎች ላይ ከሁለት ቀናት በፊት መተግበር እንደጀመረ ነው በድረ ገጹ ይፋ ያደረገው፡፡

አየር መንገዱ አክሎም ከአዲስ አበባ ወደ ዋሽንግተን ዲሲ እና ቶሮንቶ እንዲሁም ከለንደን እና ከቶሮንቶ ወደ አዲስ አበባ የሚያደርጋቸው በረራዎች ላይ ሙከራውን እንደሚያካሂድ አስታውቋል።