የአዲስ አበባ ከተማ አስተዳደር እና ሲኖዶሱ በመስቀል አደባባይ ጉዳይ ለመወያየት ለዛሬ የያዙት ቀጠሮ ሳይሳካ መቅረቱን የከተማ አስተደዳሩ አሳወቀ

አምባ ዲጂታል፣ ረቡዕ ጥር 25፣ 2014 ― የአዲስ አበባ ከተማ አስተዳደር እና የኢትዮጵያ ኦርቶዶክስ ተዋህዶ ቤተክርስቲያን ቅዱስ ሲኖዶስ በመስቀል አደባባይ ጉዳይ ለመወያየት በዛሬው እለት የያዙት ቀጠሮ ሳይሳካ መቅረቱን የከተማው አስተዳደር ፕሬስ ሴክሬተርያት አሳውቋል፡፡

የፕሬስ ሴክሬተርያቱ ባሰፈረው መረጃ ለዛሬ በተያዘው ቀጠሮ መሠረት የከተማ አስተዳደሩ አመራሮች ‹‹ቀጠሮ በተያዘበት ቦታና ሰአት የተገኙ ቢሆንም ቅዱስ ሲኖዶሱ በላከው መልእክት ዛሬ በስብሰባው ላይ መገኘት ባለመቻላቸው ሌላ ተለዋጭ ቀጠሮ እንዲያዝ በመጠየቅ›› የዛሬው ስብሰባ ሳይካሄድ ቀርቷል፡፡

የአዲስ አበባ ከተማ አስተዳደር አያይዞም ‹‹እንደ ሁልጊዜውም ሁሉ ከኢትዮጵያ ኦርቶዶክስ ተዋህዶ ቤተክርስቲያን ጋር ለመወያየት እና አብሮ ለመስራት በማንኛውም ሁኔታና ሰአት ዝግጁ መሆኑን ለማሳወቅ እንወዳለን›› ብሏል፡፡

የቀጠሮውን መቅረት በተመለከተ የኢትዮጵያ ኦርቶዶክስ ተዋህዶ ቤተክርስቲያን ቅዱስ ሲኖዶስ ይህ ዘገባ እስከተጠናቀረበት ሰአት ድረስ ያለው ነገር የለም፡፡