አምባ ዲጂታል፤ ቅዳሜ ነሐሴ 28፣ 2014 ― የአሜሪካ የአፍሪካ ቀንድ ልዩ ልዑክ የሆኑት ማይክ ሐመር ወደ ኢትዮጵያ ሊያቀኑ መሆኑን የአገሪቱ የውጭ ጉዳይ መስሪያ ቤት አስታውቋል፡፡
ልዩ ልዑኩ የኢትዮጵያ ጉዟቸውን የሚጀምሩት ነገ እሑድ ነሐሴ 29፣ 2014 ነው፡፡ ከተሾሙ ወዲህ ለሦስተኛ ጊዜ ወደ ኢትዮጵያ እና የምሥራቅ አፍሪካ ቀጣና የሚያቀኑት ሐመር፤ ያገረሸው የሰሜን ኢትዮጵያ ጦርነት ቆሞ የሰላም ንግግር እንዲጀመር ያሳስባሉ ተብሏል፡፡
እንደ አሜሪካ ውጭ ጉዳይ መስሪያ ቤት መረጃ፤ ማይክ ሐመር በዚህ ቆይታቸው ከኢትዮጵያ መንግሥት እና ከአፍሪካ ኅብረት ከፍተኛ ባለሥልጣናት ጋር እንዲሁም ከሲቪል ማኅበራት እና ሌሎች የፖለቲካ ተዋንያን ጋር ውይይት ያካሄዳሉ፡፡
ማይክ ሐመር ደረጉት ከሳምታት በፊት ባደረጉት የኢትዮጵያ ጉብኝት፤ ከአውሮፓ ህብረት አቻቸው አኔት ዌበር፣ ከተባበሩት መንግስታት ድርጅት የአፍሪካ ቀንድ ልዩ ልዑክ ሃና ቴት እንዲሁም ተቀማጭነታቸውን በአዲስ አበባ ካደረጉ የካናዳ እና ጣሊያን አምባሳደሮች እንዲሁም የአሜሪካ ተወካዮች ጋር በመሆን ወደ ትግራይ ክልል መቀመጫ መቐለ ከተማ አቅንተው ክልሉን ከሚመራው ሕወሓት ባለሥልጣናት ጋር መወያየታቸው ይታወቃል፡፡
